Brot á skólareglum.

Ef nemandi gerist sekur um alvarleg eða endurtekin brot á skólareglum er heimilt að vísa honum tímabundið úr skóla meðan leitað er úrlausna á hans málum enda verði forráðamönnum og fræðsluyfirvöldum tilkynnt tafarlaust um ákvörðun skólayfirvalda.  (Alvarleiki brota skilgreinist af fjölda refsistiga og telst orðið alvarlegt þegar skólasóknareinkunn er komin í 5.  Brot á 7. reglunni telst alvarlegt brot.  Aðför að starfsmanni skólans telst alvarlegt brot.  Fautaleg árás á skólafélaga telst alvarlegt brot).

Ef nemandi veldur verulegri truflun á kennslustund og lætur sér ekki segjast við áminningu kennara er heimilt að vísa nemandanum úr tíma.  Komi til slíkrar brottvísunar, skal farið með nemanda til skólastjóra og sækir nemandinn ekki kennslustund hjá viðkomandi kennara fyrr en að afloknu viðtali.

Umsjónarkennara skal gerð grein fyrir agabroti nemandans og skal hann láta forráðamann nemandans vita.

Nemendur eru ábyrgir fyrir því tjóni sem þeir kunna að valda á eignum skólans, starfsfólks eða skólafélaga sinna. 

Verði nemandi uppvís að notkun farsíma, fjarskiptatækja eða tölvuleikja innan skólans fær hann aðvörun en við endurtekið brot mun viðkomandi tæki gert upptækt og afhent skólastjóra.  Gerist slíkt skal viðkomandi tæki sótt af forráðamanni nemanda.

Gerist nemandi sekur um alvarlegt brot á skólareglunum eða lögum almennt hvar sem er á vegum skólans verður hann sendur heim á kostnað forráðamanna sinna.

Umsjónarkennari færir inn á sérstakt ferilblað brjóti nemandi reglur skólans, sem  síðan er skráð inn á punktakerfi nemandans.