Breiðdalshreppur nær yfir Breiðdal sem er mestur dala í Austfjarðafjallgarðinum.  Dalurinn skiptist í Suðurdal og Norðurdal. Mikil náttúrufegurð er í Breiðdal og rísa fjöllin kringum dalinn í yfir 1100 m hæð og eru margar fornar póstleiðir milli fjallaskarða.  Að sunnanverðu er Breiðdalseldstöð, forn eldstöð með marglitum líparítsmyndunum. 

Um Breiðdal fellur Breiðdalsá sem á upptök sín í Heiðarvatni á Breiðdalsheiði.  Margar þverár falla í Breiðdalsá, mest þeirra er Tinna sem kemur úr Tinnudal en Norðurdalsá fellur í Tinnu. Breiðdalsá er vaxandi laxveiðiá. Aðalatvinnuvegurinn á Breiðdalsvík er fiskvinnsla en sauðfjárrækt í sveitinni.   

Breiðdalsvík varð löggiltur verslunarstaður árið 1883 en fyrsta íbúðarhúsið var reist þar árið 1896. 

    Breiðdælingar eru nú innan við 300 talsins og búa um 2/3 hlutar þeirra í þorpinu Breiðdalsvík og um þriðjungur í sveitinni. 

    Elstu heimildir um byggð í Breiðdal eru í Landnámu en þar segir m.a: “Þjóðrekur hét maður, hann nam fyrst Breiðdal allan.”  Mun það væntanlega hafa verið um árið 900. Þekktastur landnámsmanna í Breiðdal er hins vegar Hrafnkell Freysgoði og er ungmennafélagið í byggðarlaginu kennt við hann. 

    Hótel eru á Breiðdalsvík. Hótel Bláfell og Hótel Staðarborg, tjaldstæði eru við bæði hótelin.  Að auki er Cafe Margret, kaffi- og matsöluhús, sem býður auk þess upp á gistingu í nokkrum herbergjum.    

Nokkrir bændur bjóða einnig upp á ferðaþjónustu t.d. veiði og hestamennsku. 

    Staðarborg var upphaflega grunnskóli og starfaði sem slíkur frá 1958 til 1992 er starfsemi var flutt í nýjan skóla í þorpinu Breiðdalsvík.

    Kirkjustaður Breiðdælinga er að Heydölum, um 7 km innan við þorpið.  Núverandi kirkja var vígð árið 1975.

Núverandi grunnskóli var vígður 1992.  Árið 2001 var vígt glæsilegt íþróttahús á Breiðdalsvík og 2002 bættist svo við sundlaug.  Öll þessi góða aðstaða er mikil bylting á þjónustu við íbúa  sveitarfélagsins.